專業咖啡知識交流 更多咖啡豆資訊 請關注咖啡工房（微信公衆號cafe_style ）

• 深圳咖啡館-懶人星球喺深圳咖啡店黎講屬於熱門名單，長期排頭幾位，去過後我都覺得名副其實。
   
  深圳有唔少呢類型位於高樓之中嘅咖啡店，除左之前去過一間位於石廈嘅【KONG】外，此店喺環境、食物質素方面都稍勝。
   
  懶人星球位於卓越世紀中心，熟口熟面呢，正是位於卓越INTOWN商場旁邊嘅商廈，靠近地鐵崗廈或會展中心站。
   
  卓越世紀中心分幾座，此店屬3號樓，地下嘅勝記旁邊坐電梯上33樓便是。
   
  有別於其他高空咖啡館，日頭系cafe，指11:30-19:30，供應咖啡、果茶，甜點。晚上會換成小酒吧風格，營業至凌晨，系截然不同嘅氣氛。
   
  分爲兩層，每層面積稍爲狹小，但花左相當多心思去裝潢，吧檯位置有格調
   
  書架、大玻璃窗，配合梳化位，坐得舒適。雖然唔屬於靚景，至少景觀遼闊。
   
  星空 RMB¥28
   
  以高空咖啡店而言，飲品唔算貴。其實系柚子梳打漸層飲品，唔少得會變色嘅蝶豆花成份。
   
  梳打水比例唔多，唔會成肚氣，味道無功無過。
   
  草莓乾酪慕斯 RMB¥43
   
  當日都系賣剩一款，相對其他款式，造型較普通，幸好味道唔錯，稱用上較優質嘅材料，只好下次回訪再試其他。
   
  粉紅色朱古力鏡面厚薄適中，甜度稍高，裏面層次唔算多，草莓慕絲搭配奶油乾酪夾心，綿密軟滑，乾酪味香濃
   
  其實同香港好多靚少少嘅連鎖餅店質素差不多，價錢貴啲，不過食埋環境囉。
   
  而最多人關心嘅，系2樓嘅設計，呢條樓梯都有唔少網美影相，輕鬆變兩米長腿。
   
  2樓分成6個小房間，其中三間系單人房，配備一張按摩椅，按時收費，RMB¥35/小時，不設低消。
   
  另外三間屬於小型房間，只有布簾，可容納三至四人，日頭低消滿RMB¥150-160即可享用 （如果唔到低消又想坐房，需付RMB¥38服務費）
   
  晚上系小酒吧形式，低消會較高，可自行查詢店家。
   
  房間方便合同朋友傾下計，坐足幾粒鍾夠划算啊。我地平日黃昏前來，客人唔多，未知假日情況如何。
   
  LazyPlanet懶人星球
   
  地址：深圳海田路卓越世紀中心3號樓B座3317 （地鐵崗廈/會展中心站）